Egbon and Mazi

Pidgin News (156): COVID-19 Grant For Drivers

COVID-19 Grant For Drivers

Mazi: (Song…., Chineke Idima o idima, idima eh, Chineke God o, las las i dey part of the people wey enter December, kai, my belle just dey sweet me, like say i win jackpot

Egbon: ( Song…, Ope lo ye keru oda o, ope loye keru o da, my brother true true, we suppose sing, dance and even thank Baba God say we see December

Mazi: This year 2020 naa Gen Gen.. ( cut in..

Egbon: Infact naa Elele, plenty something happen this year o, Kooda mouth no fit report everything wey eyes see for this year

Mazi: Naa to just thank Baba God o, him do me well no be small, see that lockdown, the virus, the protests plus plenty killings wey happen this year

Egbon: Oluwaseun, Naa Baba God we suppose praise o, imagine say him no protect us, shey naa this government we for rely upon say make dem protect us

Mazi: Hmmm, Egbon, just thank God, leave government alone, because i know say if we start to dey talk that government own, we no go talk am finish today

COVID-19 Grant For Drivers

Egbon: Tor, if you talk say make we no talk their matter, i don commot mouth o

Mazi: I no talk say make we no talk their matter, i no just want make you start to dey complain again

Egbon: I don tell you say make you no dey make am look like say naa me like to dey complain, no be this country we gather dey

Mazi: I don hear you, i even hear for news say government wan start to dey give drivers COVID-19 money, wey dem go fit hold body, dem call am COVID-19 Grant For Drivers

Egbon: That one no be bad idea, e make sense, but shey no be padi padi dem go take am do, abi dem go give everybody wey suppose get am

Mazi: According to the news o, dem no talk say naa political something o, dem say naa 4, 505 drivers dem go give the money for each state round Naija

Egbon: Nice one, i give federal government kudos, i carry Gbosa give dem like that, but naa how much be the money wey dem wan give each person self?

Mazi: Naa now you dey talk, if government do well, make we give dem Gbosa, i hear say naa 30,000 naira for each driver wey dey ride either Uber, Bolt, taxi, bus, Keke Napep, Okada plus other others

Egbon: My own be say, make dem no sha do Ojoro, make dem share am as e suppose be

Security Operatives Finally Arrest Maina

Mazi: I believe say government go share am as dem suppose share the money

Egbon: Naa that one go make sense o, Mazi, con check this Maina story o, dem say naa Niger Republic dem arrest am

Mazi: Hmmm, but wait o, how him take commot Nigeria go Niger Republic if no be say some people get hand inside the matter

Egbon: You see, shey you self dey see the thing wey i dey always talk, no be say him disappear commot, naa some people go get hand inside how him take commot for the country now

Mazi: O dika serious o, and dem con go put Ndume for prison sake of say naa him stand as him Sureity

Egbon: Dem don leave am say make him commot prison, and now wey dem don arrest am, the load go commot for Ndume head

Mazi: Ok sha, how Christmas wan be, abi you never start to dey prepare

Egbon: Naa make God keep our life, i wan buy foodstuff put for house before Christmas too near sake of say the thing go dey expensive when the celebration don close

Mazi: Naa true o, my brother make i con dey go 

Egbon: No wahala, happy new month to you, help me greet your wife

Mazi: Same here my brother, naa the Joy wey dey my belle no make me greet you happy new month since, take care

Back to top button
EveryEvery We would like to show you notifications for the latest news and updates.
Dismiss
Allow Notifications