Iyabo Ojo Blows Hot Again
Mazi: Hiss… all these 419 people go just dey disgrace Naija up and down, no wonder why all these obodo oyinbo people dey always suspect Nigerians
Egbon: you self don later realise say most of these Naija politicians dey disgrace the country bah?
Mazi: Who dey talk about politicians, na one of the problems wey we get be this, all of us dey quick blame leaders, we no dey see the ones wey we dey do
Egbon: Abeg o, which one we do o, no be politicians dey thief money wey dem suppose take do better for the people
Mazi: Bia, con take your eyes check am, shey this one na politician, or na youths wey get insect inside him eyes, dem say him name na Abidemi Rufai, say him collobi $350,000 for America
Egbon: Ahhh, that money na big money o, how him take collobi that plenty money for America
Mazi: Dem say na the kind thing wey Hushpuppi do, him too do, say him take computer thief the money wey US government plan to give their people sake of COVID-19 palava
Egbon: Hmmm, true true, some people dey drag Naija name inside mud, ah ah, and small time now, people wey no sabi where him see money go dey envy him
Buhari to Borrow Bigger Loan
Mazi: As you see me so, na why i no dey like envy anybody be that and na because of people like these, wey dey take back door make their money
Egbon: Hmm, Mazi, na this money wey you mention now now remind me of the tory wey i read this morning o
Mazi: Wetin dey inside the tory?
Egbon: The tory talk say, Buhari write letter go Senate, say him wan make dem approve $6.18bn loan for him government
Mazi: Shuuuu, that money plenty for ear o, but na wetin him wan take am do?
Egbon: I know? no be so so borrow borrow we dey hear, we no dey know how the money matter end now
Mazi: And e no suppose be like that, Naija suppose get agency wey go dey monitor all these money
Egbon: Hiss.. no be same same be all of them, abeg commot that matter jare
Mazi: Tor, you don hear the latest ontop Baba Ijesha case, i hear say dem don bail him
Egbon: Na as you hear am, me self hear am o, i con hear say Iyabo Ojo dey para
Mazi: Make we no lie, this Iyabo Ojo try ontop this matter o, she no wan make dem bury the matter at all
Egbon: Hmm, that Iyabo Ojo woman get energy no be small, you no wetin vex her?
Mazi: Abeg gist me
Egbon: Iyabo Ojo talk say na Naija people be the problem of this country, say no be leaders, she say some people dey talk say why she carry the matter for her head like dreadlock
Ordinary President Faces Backlash
Mazi: You see say the thing wey she talk no too different from the thing wey i first talk, no be all the problem we suppose dey put ontop government
Egbon: Me too no talk say make we put all the problem ontop government, but na dem dey do pass
Mazi: We no need argue, i hear something about Ordinary President wey dey present programme ontop radio, dem say he slap one woman for the station
Egbon: Ehn ehn, person wey talk say him dey fight for human right, wetin the woman do him?
Mazi: For inside the video, dem say the woman pour kerosene ontop one small girl, con burn the girl, na the thing vex the Ordinary President, wey make him carry slap give the woman
Egbon: Ahhh, that woman na witch o, why she go do that kind thing
Mazi: She talk say the girl get witch, people con talk say Ordinary President no suppose do like that, make i con dey go
Egbon: Ok now, we go see later