Egbon, abeg wetin be lie detector test?
Na wa o, Mazi, I never land finish… you don burst my head with question.
Abeg, no vex na this Shehu Sani news I dey read; dem be talk say dem wan do lie detector test for am but en no gree say make dem give am Quran instead. And me I just dey wonder wetin lie detector test be
E get wan machine wey dem dey use gage whether you dey lie or not. Dem go connect am to your body den dem go ask you question. If you lie, the machine go talk say na lie you talk
Eheh, this machine good o. dem dey sell am for market?
Aaah, no be microwave wey you fit just enter market buy o. na only people wey dey for police and security work fit buy am. If Shehu talk say en no wan do the test, I support am because all these machines dey spoil sometimes and you no go fit know when e don spoil
My brother that one too dey; Machine dey spoil and machine no be human being, na the thing wey you tell am to do e go do… dem even fit do the lie detector machine make e dey talk say everything wey Shehu Sani talk na lie
Exactly, so if I be am I no go do that lie detector test.
As EFCC dey do their own INEC too dey do their own. Dem talk say Governor Yahaya Bello do double registration and dem go prosecute am
En do double registration and na after he don win election dem dey find out. Mtshw
INEC even suspend the officials wey get hand for the double registration
Okay, how dem wan take prosecute sitting governor for this kind issue?
I know? dem talk say dem go do am when en tenure finish
Haha, abeg no make me laugh. Leave that one make we talk better thing. You know say Borno Governor dey vex?
Wetin dey make am vex?
He dey vex say Soldiers dey collect 500-1000 naira bribe from travellers wey no get national identity card. Wait make I read wetin en talk “the federal government has not created an enabling environment for our people to get their national ID cards and you are here collecting five hundred naira and one thousand naira as a fine for not having what the federal government has not provided for all”
Na so en talk?
Na so I read am o
That’s a good one. En get sense; that is a governor for the people
He told dem to close the checkpoint and allow people to move freely
Wow, I commend am. That is a governor who knows what the government has done for the people and not done. I’m impressed.
Me too, at least it shows say he get human feeling for heart. E be like say most of these northern governors get sense, Zamfara state government don suspend eight top officials because dem don discover up to five thousand ghost workers
What? Five thousand? A whole five thousand?
I’m telling you, dem dey collect salary for a good five thousand ghost workers and the salary amounts to up to two hundred and sixteen million naira
That is too much money
Dem talk say na because of that loss na em make say dem no fit pay the new minimum wage and some workers dey there dey earn seven thousand naira only
Seven thousand naira? A month?
A month o
God forbid! How person go take survive with seven thousand naira a month? Kai people dey suffer for this country
I dey tell you. Make I come dey go, I get one special appointment
All these your special appointment, which time we go reap the fruit now?
Jesus is coming soon… so no tell me that one
I don go abeg. Leave me